موضوع النهاردة عن اعوجاج الحاجز الانفي وتضخم غضاريف الانف
#اعوجاج_انحراف_الحاجز_الانفي:
#deviated_nasal_septum #septoplasty
*كتير من الناس عندها الحاجز الانفي او العظمة داخل الانف معووجه كما يقال. النهاردة هنتكلم على اعوجاج الحاجز الانفي.
*يعني ايه الحاجز الانفي؟
ده يعتبر فاصل او حاجز بيفصل مجرى الانف الى نصفين متساويين من جوه وبيبقى فيه فتحة انف شمال ويمين وهوه بيفصل بينهم. يعني احنا بنتنفس من الانف من الناحية الشمال والناحية اليمين وبينهم فاصل اسمه الحاجز الانفي.
*بيتكون من ايه الحاجز الانفي؟
بيتكون من غضاريف وعظام. وبيمسك الانف من المقدمة وبيمتد جوه الانف لغاية آخرها.
*يعني ايه اعوجاج او انحراف الحاجز الانفي؟
يعني الحاجز الانفي مش ماشي في المنتصف بالظبط وقاسم الانف نصفين متساويين. بيبقى جاي على ناحية ومضيقها وقافل المجرى الانفي فيها سواء اليمين او الشمال. وأحيانا يبقى معووج في كذا مكان وقافل الناحيتين.
* سببه ايه اعوجاج الحاجز؟
ممكن يكون الانسان معووج بيه من ساعة الولاده وممكن يكون اتخبط على الانف واتعوج وكان قبلها سليم.
*ايه أعراض اعوجاج الحاجز الانفي؟
صعوبة في التنفس، ممكن شخير اثناء النوم، ونزول سائل من الفم أثناء النوم و عدم القدرة على الجري او بذل مجهود لضيق النفس، صداع في مقدمة الرأس او حول الانف. نزيف متكرر من الانف. والاعراض دي دايما بنلاقيها في الاعوجاج المتوسط او الكبير. انما لو اعوجاج خفيف لا يؤثر على شئ.
* نشخصه ازاي؟
بالكشف الطبي وعمل الاشعة اللازمة اللي بتبين مقدار الاعوجاج وهل هو سبب مشكلة التنفس ولا فيه اسباب اخري زي الحساسية واللحمية والغضاريف الانفية. وممكن يكون اكتر من سبب مع بعض وده بنلاقيه كتير زي اعوجاج الحاجز مع غضاريف الانف المتضخمة.
* ايه الحل؟
للاسف الحاجز الانفي المعووج ملوش علاج بالادوية. الحل هوه عملية استعدال الحاجز الانفي ولو معاها غضاريف انف بتتعمل في نفس العملية بالمنظار.
*في ناس كتير بتخاف من العملية، هل العملية دي صعبة وبترجع تاني؟
العملية زي اي عملية بتاخد فيها بنج كلي وتنام وتصحى تلاقيك عملتها. وقتها من نصف ساعة لساعة. ولا يوجد بها صعوبة ويتم عملها بالمنظار ولا يوجد اي فتح خارجي او تغير شكل الانف من الخارج. ونسبة نجاحها كبيرة جدا ومضاعفاتها قليلة جدا. طبعا العظمة لما بتتعدل مبترجعش تاني.
* ايه السن المناسب لعمل العملية؟
في الذكور بعد ١٦ سنة وفي الاناث بعد ١٥ سنة. في السن الصغير لو الحاجز الانفي معووج جدا وقافل النفس نهائي بيضطر يعمل العملية ولكن بيكون الجراح أكثر تحفظا في استعدال الحاجز لان انف الطفل لم تكتمل النمو بعد.
*هل العملية بتوجع وبتاخد فترة قد ايه عشان ارجع لحياتي الطبيعية؟
طبعا في مسكنات بتتاخد بعد العملية بتمنع الوجع وبيكون فيه حشو بداخل الانف يتم ازالته بعد يومين ودعامة داخلية بعد ١٠ ايام. يعني بعد فك الدعامة ١٠ ايام بعد العملية بتمارس حياتك عادي جدا.
* في كتير من الناس الحاجز الانفي معووج وكمان الانف من الخارج معووجة ايه الحل؟
عملية استعدال الحاجز الانفي بتصلح الحاجز الانفي من الداخل فقط. انما لو عظام الانف من الخارج معووجه بتحتاج تتصلح بعملية اخري وهي عملية تجميل الانف الخارجي. ممكن طبعا الاتنين يتعملوا مع بعض في نفس العملية. عمليات تجميل الانف هنتكلم عليها ان شاء الله بعد كده بصورة مفصلة.
*إحجز مع الأستاذ الدكتور محمد ربيع خيري أفضل إستشاري أنف وأذن وحنجرة بالزقازيق الشرقية.
#دكتور_محمدربيع_خيري إستشاري ودكتوراة الانف والأذن والحنجرة ، كلية الطب البشري جامعة الزقازيق ، إستشاري جراحات تجميل الأنف ومناظير الجيوب الانفيه.
* يقوم الاستاذ الدكتور محمد ربيع خيري بإجراء عمليات استعدال الحاجز الانفي بأفضل المراكز والمستشفيات بالزقازيق وبأحدث المناظير والألآت وأفضل أجهزة التعقيم لسلامة المرضى وإعطاء أفضل النتائج بأسعار مناسبة للجميع 🙂.
*العنوان: الزقازيق - ميدان الصاغة - برج الصاغة - أول الكوبري - أمام مصوغات وديع انطوان.
*مواعيد العمل: من السبت الى الخميس إسبوعيا ، من ٣ - ٥ م ومن ٨ - ١٠ م
*سعر الكشف ١٠٠ جنيه فقط 🙂 الاعادة والمتابعة مجانا . غسيل الأذن مجانا . الكشف بالمناظير مجانا. هدفنا إعطاء خدمة مميزة للمرضى بسعر مناسب.
#تضخم_غضاريف_الانف:
#nasal_turbinate
هنتكلم النهاردة عن غضاريف الانف.
*ايه هيه غضاريف الانف؟
غضاريف الانف هيه نتوءات بارزة داخل مجرى الانف ويوجد ٣ منها بكل ناحية من فتحات الانف.
*ايه وظيفة غضاريف الانف؟
الغضاريف عاملة زي الدفاية بيمشي جواها دم وبتساعد على تدفئة الهواء اللي بيمشي داخل مجرى الانف قبل ما يوصل الرئتين.
*يعني اية تضخم الغضاريف؟
يعنى الغضاريف كبرت في الحجم وبدأت تقفل مجرى الانف وتعمل صعوبة في التنفس.
*المريض اللي عنده تضخم بغضاريف الانف بيشتكى ويحس بإيه؟
هيكون فيه كتمه وصعوبة بالتنفس من الانف وبيفتح الفم كتير عشان يعرف يتنفس وخصوصا بالليل وهوه نايم وممكن يبقى فيه شخير اثناء النوم.
* نتأكد انها غضاريف انف ازاي مش لحمية او حساسية او حاجز انفي؟
طبعا بالكشف الطبي وعمل الاشعة المقطعية للانف ودي بتوضح أسباب صعوبة التنفس من الانف.كما هو موضح بالصورة.
*هل ممكن يكون فيه اسباب اخري مع غضاريف الانف تعمل كتمة بالانف؟
طبعا كتير بنشوف غضاريف الانف مع اعوجاج الحاجز الانفي وممكن يكون فيه لحمية كمان سواء لحمية اللوز او لحمية الجيوب الانفية.
* طب ايه سبب تضخم غضاريف الانف؟
فيه طبعا اسباب كتير من ضمنها واشهرها هو الحساسية. ودي بمرور الوقت بتكبر الغضاريف لدرجة انها تقفل مجرى الانف تماما.
* طب اية علاج تضخم غضاريف الانف؟
لو الموضوع لسه في الاول ولا يوجد انسداد كامل لمجرى الانف بنجرب علاج الحساسية اللي هوه عبارة عن بخاخة انف للحساسية زي أفاميس وفلكسونيز ونازونيكس وتيكاناز واقراص للحساسية زي زيرتك وموسيدين وتلفاست. ممكن نعطي مزيل للاحتقان يفتح الانف مؤقتا لان علاج الحساسية بياخد وقت عقبال مايشتغل ولازم الاستمرار عليه لفترة حتى يعمل مفعول جيد.
* انا باخد بخاخة يا دكتور ومش جايبه نتيجة والتنفس لسه مكتوم؟
ممكن يكون السبب عدم انتظام على بخاخة الحساسية او ان الغضاريف كبرت خالص ولا تستجيب للعلاج.
* طب ايه علاج الغضاريف التي لا تستجيب للبخاخة؟
هيبقى الحل التاني للموضوع هوه عملية تصغير لغضاريف الانف بالمنظار. وده حل لكتير من الناس التى لا تستجيب للعلاج او زهقت من استخدام البخاخة ومش منتظمين عليها.
* العملية دي صعبة يا دكتور؟
ليس بها أي صعوبة ولا يوجد منها مخاطر اذا تم عملها عن طريق دكتور متخصص وبطريقة سليمة.
* بتاخد وقت قد ايه العملية وارجع لشغلى الطبيعى؟
من اسبوع ل١٠ ايام.
* هل الغضاريف دي بعد العملية بترجع تاني؟
المفروض مفيش رجوع فيها. بتاخد سنين عشان ترجع وبيكون سببها الحساسية الشديدة والاهمال في اخذ علاج الحساسية.
*طب لو فيه غضاريف انف مع حاجز انفي او لحمية جيوب انفية؟
طبعا كل ده ممكن يتعمل في نفس العملية بالمنظار ولكن وقت العملية بيبقى اطول والتكلفة اكبر. والنتيجة في التنفس طبعا افضل.
* لايك و شير عشان غيرك يستفيد. Share
*إحجز مع الأستاذ الدكتور محمد ربيع خيري أفضل إستشاري أنف وأذن وحنجرة بالزقازيق الشرقية.
#دكتور_محمدربيع_خيري إستشاري ودكتوراة الانف والأذن والحنجرة ، كلية الطب البشري جامعة الزقازيق ، إستشاري جراحات تجميل الأنف ومناظير الجيوب الانفيه.
* يقوم الاستاذ الدكتور محمد ربيع خيري بإجراء عمليات تضخم غضاريف الانف بأفضل المراكز والمستشفيات بالزقازيق وبأحدث المناظير والألآت وأفضل أجهزة التعقيم لسلامة المرضى وإعطاء أفضل النتائج بأسعار مناسبة للجميع 🙂.
*العنوان: الزقازيق - ميدان الصاغة - برج الصاغة - أول الكوبري - أمام مصوغات وديع انطوان.
*مواعيد العمل: من السبت الى الخميس إسبوعيا ، من ٣ - ٥ م ومن ٨ - ١٠ م
*سعر الكشف ١٠٠ جنيه فقط 🙂 الاعادة والمتابعة مجانا . غسيل الأذن مجانا . الكشف بالمناظير مجانا. هدفنا إعطاء خدمة مميزة للمرضى بسعر مناسب.
تعليقات
إرسال تعليق
أكتب تعليقك او استفساراتك وسيتم الرد من قبل استشارى متخصص في جراحات وامراض الانف والاذن والحنجرة وتجميل الانف والوجه