اعوجاج الحاجز الانفي وتضخم غضاريف ‏الانف

#نزيف_الأنف

#Nose_bleeding #epistaxis

*نزيف الانف عند الاطفال والكبار.
نزيف الانف عند الاطفال بيختلف اسبابه عن نزيف الانف عند الكبار. هنتكلم النهارده عن نزيف الانف عند الاطفال.

* ايه اسباب نزيف الانف عند الاطفال؟
اهم واشهر سبب هو ضعف الشعيرات الدموية عند الاطفال و دي حاجة منتشرة جدا. والشعيرات الدموية بتبقى منتشرة بغزارة على الحاجز الانفي في المنتصف من الامام. وموجودة على الناحيتين الشمال واليمين. يعني ممكن الطفل تلاقيه بينزف من الناحية الشمال او اليمين او الأتنين.

* ايه العوامل المساعدة اللي تخلى الطفل ينزف من الانف؟
في عوامل كتير بتساعد على حدوث النزيف. مثل تغييرات الجو والشمس والجو الحر والرطوبة والاتربة ، وجود التهابات واحتقان في الانف او رشح مستمر، حدوث خبطات خفيفة على الانف اثناء اللعب او المشاجرة او اثناء النوم ممكن الطفل يخبط الانف في المخدة وهو نايم، والأم تلاقي في دم على المخدة.

*ازاي نقدر نشخص ان سبب النزيف ضعف الشعيرات الدموية؟
طبعا بالكشف الطبي بنلاقي الشعيرات الدموية محتقنه ومليانه دم وممكن نلاقي اثار الدم المتجلط عليها.

*إيه العلاج ولو حصل نزيف في البيت او الشارع بنعمل ايه؟
العلاج عبارة عن ادوية تقفل الشعيرات الدموية وتمنع نزيفها زي الدهان والمراهم داخل الانف لترطيب الشعيرات الدموية ونقط مزيلة للاحتقان وممكن نعطي حقنة لوقف النزيف لو النزيف شديد. نعطي ادوية للرشح والاحتقان. وبنعطي احيانا فيتامين سي لتقوية جدار الشعيرات الدموية.
أثناء النزيف في البيت او الشارع ، يقوم الاب او الام بقفل الانف من الامام والضغط عليها من الجانبين لمده ١٠ دقائق والطفل ينزل رأسه للامام وليس للخلف عشان الطفل ميبلعش الدم من الانف للفم من الوراء. ونضع قطعة ثلج على الانف من الخارج. درجة الحرارة المنخفضة بتقفل الشعيرات الدموية.

* النزيف المتكرر والشديد ولا يتوقف بالعلاج ايه الحل؟
الحل الافضل وهو كي الشعيرات الدموية اللي بتنزف. ده طبعا بيقلل كمية النزيف ومرات حدوثه. في اطفال كتير بتعمل كي وبتنزف برده ايه السبب؟ طبعا الكي بيتم للشعيرات اللي بتنزف فقط ولا يتم كي كل الشعيرات الدموية. يعني ممكن شعيرات دموية جديدة تنزل دم وتفتح من اول وجديد. بيتم تكرار الكي لها وبيكون هناك فترات بين جلسات الكي. اسابيع بين كل جلسة وجلسة ولا يتم على الناحيتين في المرة الواحدة.

*الكي نفسه وتكراره لا يؤذي الانف ولا يوجد به خطورة. ولكن يجب ان يتم بشكل سليم واوقات مظبوطة.

* يتم عمل الكي بالمخدر الموضعي بالعيادة ومدته لا تتجاوز ربع ساعة ولا يوجد به الم او خطورة.

مرحبا بك في مركز الاستاذ الدكتور / محمد ربيع خيري ........ أفضل إستشاري الأنف والأذن والحنجرة و جراحات تجميل الأنف ومناظير الجيوب الانفية بالزقازيق.

*العنوان: الزقازيق - ميدان الصاغة - برج الصاغة - أول الكوبري

*مواعيد الكشف بالمركز: من السبت إلى الخميس
الفترة الأولى من ٣ - ٦ م
الفترة الثانية من ٨ - ١٠ م

* تليفون الحجز ٠١١٤٠٧٨٢٧٨٨ - ٠١٠٦٦٢١٤٤٩٦

#حساسية_الأنف_والكورونا.

* ما الفرق بين حساسية الانف والكورونا ؟

* في تشابه كبير بين مرض الحساسية والكورونا اللى ممكن تلخبط الانسان وتخليه يعتقد ان عنده كورونا.

* في البوست هنحاول نفرق بين الاتنين ونقول الاعراض المتشابهه والاختلاف.

* الاعراض المتشابهة بين الاتنين: 

✅ انعدام حاسة الشم وممكن يكون معاها انعدام حاسة التذوق. ولكن في مريض الحساسية الموضوع ده موجود عنده من سنين وليس اول مرة. إنما مريض الكورونا أول مرة تحصل له. 

مريض الكورونا مش حاسس بطعم الاكل وفاقد للشهية. انما مريض الحساسية ممكن يكون مش حاسس بطعم الاكل انما بياكل طبيعي زي كل الايام.

✅ الكحة  من الاعراض المتشابهة. لكن في الكورونا الكحة بتكون ناشفة ، إنما في الحساسية بيكون في افرازات وبلغم وخاصة في مرض حساسية الانف والصدر.

✅ ضيق التنفس من الاعراض المتشابهة وخاصة في مرضى حساسية الانف والصدر. 

لكن في مرضى الحساسية ضيق التنفس بيكون خفيف ومستقر الى حد ما. انما في الكورونا ممكن يتطور ونسبة الاكسجين تقل في الدم والصدر يحدث في التهابات رئوية وده نقدر نعرفه بعمل الاشعة المقطعية على الصدر وقياس نسبة الاكسجين في الدم .

✅ التعب والاجهاد من الاعراض المتشابهة ولكن في الكورونا بيكون الارهاق شديد مش قادر تتحرك وفي الم في العضلات والمفاصل. انما مرضى الحساسية التعب والاجهاد بيكون بسيط والشخص بيقدر يتحرك ويبذل مجهود طبيعي.

** الاعراض المختلفة بين مرضى الحساسية والكورونا واللى ممكن نفرق بيها بين الاتنين:

❎ مرضى الحساسية ( حساسية الأنف والصدر) بقالهم سنين عندهم حساسية والاعراض دي بتتكرر عليهم كل سنه وفي مواسم معينه للي عندهم حساسية موسمية زي فصل الربيع. إنما مريض الكورونا أول مرة تحصله الاعراض السنة دي.

❎ مرضى الحساسية عندهم عطس ورشح وانسداد بالانف وحكة في الانف أو الحلق أو العين أو الأذن. و ده فرق كبير جدا مش موجود في مرضى كورونا.

❎ مرضى كورونا عندهم سخونية شديدة وألم بالحلق والبلعوم وألم بالجسم والمفاصل وممكن اسهال. انما مرضى الحساسية مفيش الاعراض دي خالص.

✳ دي الفروق بين الاتنين من ناحية الاعراض. من ناحية التحاليل اللى بتأكد وتفرق الاتنين عن بعض: 

* اختبارات الحساسية لمرضي الحساسية.

* المسحة لمرضى الكورونا.

*الاشعة المقطعية على الصدر لو فيه ضيق تنفس، يقدر يفرق بين الكورونا وحساسية الصدر.

#دكتور_محمدربيع_خيري

دكتوراة وإستشاري الأنف والأذن والحنجرة وجراحات ومناظير وتجميل الأنف.

مدرس بكلية الطب جامعة الزقازيق.

🔰 العنوان : الزقازيق - ميدان الصاغة - أول الكوبري - اعلى صيدلية العوضي.

🚸 المواعيد : من السبت الى الخميس

       من ٤ - ٨ مساءا

📳 تليفون الحجز :  ٠١٠٦٦٢١٤٤٩٦

#فقدان_حاسة_الشم_والتذوق

* هل فقدان حاسة الشم والتذوق معناه الاصابة بمرض كورونا؟

* ناس كتير بتسأل على الصفحة وبتبعت رسائل ان عندهم فقدان حاسة الشم والتذوق وهل ده ممكن يكون كورونا؟

* فقدان حاسة الشم لها اسباب كتير. ممكن تكون بسبب دور برد أو انفلونزا أو حساسية انف او التهابات حادة أو مزمنة بالجيوب الانفية أو انسداد مجرى الانف بسبب وجود لحمية أو تضخم بغضاريف الانف أو اعوجاج شديد بالحاجز الانفي  وممكن تكون كورونا كمان 😮.

* الكورونا اساسا فيروس زي الانفلونزا بيصيب الجهاز التنفسي وممكن يعمل التهابات بعصب الشم ويؤدي الى فقدان حاسة الشم.

* نعرف إزاي إن فقدان حاسة الشم سببها كورونا وليس سبب أخر؟

طبعا عشان نتأكد ١٠٠% ان السبب هو كورونا ، هنحتاج نعمل تحليل اللى هو مسحة تتاخد من افرازات الانف والبلعوم ونبعتها المعمل والجهاز بيحللها ولو وجد فيها فيروس كورونا هتطلع النتيجة ايجابية ويبقى كده اكيد ان المريض عنده كورونا 🤕. 

* هل فيه علامات او اعراض ممكن تظهر مع انعدام حاسة الشم ، ممكن تعرفنا اذا كان السبب كورونا أو لأ ؟

الكلام ده من ابحاث معمولة على مرضي كورونا، وجدوا فيه:

١- وجود فقدان حاسة التذوق في ٨٠% من المرضى. يعني مريض الكورونا مش شامم ولا حاسس بطعم الاكل.

٢- احتقان في الانف ورشح في ٥٠% من المرضى.

٣- وجود صداع  وارهاق وتعب ووجع بالعضلات والمفاصل في ٥٠% من المرضى.

٤- وجود اسهال في ٣٠% من المرضى.

 * في اعراض لو موجودة ، بترجح سبب فقدان حاسة الشم هو الاصابة بكورونا زي : ارتفاع درجة الحرارة فوق ٣٨ درجة 🤒، كحة ، ضيق تنفس، ارهاق شديد.

* في حاجة تانية كمان وجدوها في مرضى كورونا اللى عندهم فقدان حاسة الشم : وهو إن  مفيش انسداد او كتمة بالانف و ده  ممكن يفرق مريض الكورونا من مريض الانفلونزا أو دور البرد أو الحساسية.

* يعني اللى عنده كورونا بيتنفس من الانف كويس واللي عنده دور برد وحساسية بيكون عنده انسداد وكتمة بالانف.

* مريض دور البرد او الانفلونزا حاسة الشم بترجع بعد ٣ ايام بعد ما البرد يبدأ يهدى والانف تفتح.

* بينما مريض الكورونا حاسة الشم بترجع في معظم الناس ما بين ١٠ ايام الى ٢٠ يوم من بداية فقدان حاسة الشم.

* لو احنا شاكين ان السبب كورونا نعمل ايه؟

كل الانظمة الصحية على مستوى العالم بتقول دلوقتي ان المريض اللى عنده فقدان حاسة الشم والتذوق يعزل نفسه اسبوع من بداية فقدان حاسة الشم. ويلبس كمامة باستمرار عند التعامل مع أي شخص حتى في البيت 😷. وفي دكاترة كتير بينصحوا بكده. لأن لو المريض طلع كورونا فعلا هيكون مصدر عدوى كبير لكل الناس اللى هيتعامل معاهم.

* لأنهم وجدوا ان اللى عنده فقدان حاسة الشم والتذوق بسبب كورونا عنده كمية كبيرة من الفيروس في افرازات الانف والبلعوم. وبسهولة ممكن يعدي الناس اللى حواليه ومن غير مايكون عنده اعراض تانية.

* أيه العلاج لفقدان حاسة الشم والتذوق بسبب كورونا ؟

* من غير أي علاج حاسة الشم والتذوق بترجع تاني من ١٠ الى ٢٠ يوم من بداية الاعراض.

* في أدوية ممكن تتاخد طبعا بعد الكشف الطبي وفحص الانف من الداخل للتأكد من سبب فقدان حاسة الشم،  زي بخاخة الحساسية أو فيتامين أ  أو اوميجا ٣. ووجدوا مفيش فرق كبير بين اللى اخد أدوية أو  مأخدش. زي ماقولنا بترجع لوحدها من غير أدوية.

* ممنوع طبعا يتاخد أدوية حبوب كورتيزون لانها بتقلل المناعة وممكن تزود مرض الكورونا. انما بخاخة الانف اللى فيها كورتيزون ممكن تتاخد عادي مفيهاش ضرر بعد الكشف الطبي وفحص الانف.

* في تمرينات لحاسة الشم عشان ترجع تاني وممكن تتعمل في البيت زي ان الشخص يشم زيوت لها روائح نفاذة زي روائح الورد و زيت الكافور و زيت القرنفل.

* طبعا بنحب نطمن الناس ان اللى عنده فقدان حاسة الشم والتذوق بسبب كورونا مفيش منها خوف ومش حاجة خطيرة. يحاول على قد ما يقدر مايختلطش بالناس، وميروحش يكشف سواء في عيادة او مستشفى، أولا لأن زي ماقولنا الموضوع مش خطير، ثانيا لأن حاسة الشم والتذوق هترجع لوحدها من غير علاج، ثالثا عشان ميعديش غيره سواء دكتور في عيادة او مستشفى ويكون سبب في انتشار المرض.

* المريض اللى عنده فقدان في الشم والتذوق يقعد في البيت و  ميفكرش في الكشف الا لو ظهر عنده اعراض شديدة زي ماقولنا ( كحة وارتفاع في درجة الحرارة وارهاق شديد وضيق بالتنفس) وساعتها يروح مستشفى ويحاول يعرف الدكتور بالاعراض عشان الدكتور ياخد احتياطاته قبل مايكشف عليه. حتى لا يكون سبب في عدوى الدكتور والمستشفى بالكامل.

 

#دكتور_محمدربيع_خيري إستشاري الأنف والأذن والحنجرة ، كلية الطب البشري جامعة الزقازيق.